Gaur, Euskaraz Bizi taldeak gonbidaturik, Habia taldeko Maia eta Elena kolegiorat etorri zaizkigu. Usaian bezala, bazkolondoko pausan kirol gelan elkartu gara eta bi musikariek beren lana, esperientzia eta musikaren gaineko jakitateak partekatu dituzte ikasleekin.

Erabiltzen dituzten musika tresnak ezagutu ditugu, Habia taldearen ibilbidea, musikarien bizimoldea eta hortaz bizitzeko hautua ere; beti ere, ikasleen galdereei erantzunez.

Horrez gain, zonbait kantu xoragarri eskeini dizkigute molde ezberdinez, batzuk instrumentalak, bertzeak kantatuak, bibolina, biola, metalezko ontzi eta lurrontzien doinuen artean. Milesker bihotzez Habia taldeko Elena eta Maiari!